Asteazkena, 2020ko martxoak 11a.
Hautagaien Torneoak munduko xake
jokalari onenetakoak bilduko ditu. Koronabirusak eta Kirill Alekseenkori
egindako gonbidapenak zeresana eman dute txapelketa hasi aurretik.
Fabiano Caruana —ezkerrean— Magnus Carlsenekin —eskuinean—
lehian, iaz, Norvegian. BERIT ROALD / EFE
Josu Tornay
Igandetik apirilaren 4ra bitarte jokatuko da 2020ko
hautagaien torneoa, Iekaterinburgen (Errusia). Azken urteetako lehia
handikoenetako bat izango da, eta zaila da faborito argirik aurreikustea.
Edonork irabaz dezake, eta urte bukaeran Magnus Carlsenen kontra munduko
koroagatik lehiatu. Hala ere, zailtasun eta polemika batzuk izan dira hasi
aurretik.
Alde batetik, koronabirusaren eragina egon da. Errusiak, Txinarekiko mugak itxi
eta hango herritarrei sarrera debekatu ondoren, Ding Liren eta Wang Hao maisu
handien parte hartzea arriskuan egon zen. Hala eta guztiz ere, bi jokalariek
Errusiaren baimen berezia lortu zuten txapelketan egoteko, eta, hala, lehen
oztopo serioa gainditu zen. Edonola ere, koronabirusak eragin egin die bi
jokalariei. Txinan indarrean zeuden neurrien ondorioz, bertan behera utzi behar
izan zituzten torneoa prestatzeko aurreikusiak zituzten entrenamenduak. Ding
Liren Txinan zegoen, eta etxetik entrenatu behar izan zuen; Wang Hao, berriz,
Txinatik kanpo zegoen, eta ezin izan zuen etxera bueltatu torneoaren aurretik.
Gainera, Errusiara askoz lehenago bidaiatzea eskatu zieten. Martxoaren 2tik
Moskutik gertu dagoen etxe bakartu baten daude, berrogeialdian. Hala egongo
dira torneoa hasi arte.
Bestalde, martxoaren 6an, Teimour Radjabovek iragarri zuen torneotik
erretiratuko zela. FIDEk (Munduko Xake Federazioa) arrazoi pertsonalak
argudiatu zituen. Radjabovek, ordea, adierazi zuen ez zegoela ados FIDEk
emandako azalpenekin. Baina zergatia ez zuen eman; FIDEri torneoa atzeratzeko
eskatu ziola baino ez zuen azaldu. Baina xake munduan aipatzen da arrazoiak eta
desadostasunak koronabirusarekin lotuta daudela.
Nolanahi ere, parte hartzaileen maila ikaragarria da: Fabiano Caruana
estatubatuarra; Ding Liren eta Wang Hao txinatarrak; Alexander Grischuk, Kirill
Alekseenko eta Ian Nepomniachtchi errusiarrak; Anish Giri herbeheretarra; eta
Maxime Vachier-Lagrave frantziarra. Radjabov ordezko moduan sailkatu da
Vachier-Lagrave.
Sailkatzeko eta ordezkatzeko irizpideak oso argi zeuden kasu guztietan, batean
salbu: Alekseenkorenean. Zazpi jokalarik beste torneo batzuetatik edo
rakingagatik sailkatu behar zuten. Norbait erretiratuz gero, ordezkoa
rankigaren arabera aukeratuko zen, eta hori zen Vachier-Lagraveren kasua. Baina
antolakuntzak eskubidea zuen zortzigarren jokalaria gonbidapen bidez
aukeratzeko, irizpide jakin batzuk betetzen zituzten jokalarien artean.
Errusiako Federazioak argi esan zuen bertako jokalari bat aukeratuko zuela, eta
Alekseenko gonbidatu zuen. Horrek areagotu egin zituen baldintzak betetzen
zituzten beste jokalarien kexak. Alekseenkok berak esan zuen gonbidapenen kontu
hori bertan behera utzi behar zutela etorkizunean.
Caruana
faborito
Martxoko sailkapena erreferentziatzat hartuta, irabazteko faborito nagusia
Fabiano Caruana da (2.842 elo puntu). Estatubatuarra eskarmentu handiko
jokalaria da, eta, 27 urterekin, bere kirol ibilbideko heldutasun puntura
ailegatzen ari da. Ding Lirenek Caruanaren adin bera dauka, baina elo aldetik
urrun dago, 2.805 baititu. Baina askotan erakutsi du edozeinekin lehiatzeko
moduan dagoela. Txinak, duela urte asko, apustu handia egin zuen xakearen alde,
eta emakumezkoen eta taldekako torneoetan dagoeneko erakutsi du gailurrean
dagoela. Banakako Munduko Txapelketa horren puntu gorena izango litzateke, eta
Lirengan itxaropen handia dute.
Hirugarren faboritoa Alexander Grischuk da (2.777 elo puntu). Errusiarrak
gorabehera asko izan ditu, eta, 36 urterekin, azken aukera bat izan dezake
Munduko Txapelketagatik lehiatzeko. Elo aldetik, atzetik datozen beste
jokalariak oso berdinduta daude: Nepomniachtchi (2.774 eta 29 urte),
Vachier-Lagrave (2.767 eta 29 urte), Giri (2.763 eta 25 urte), Wang Hao (2.762
eta 30 urte) eta Alekseenko (2.698 eta 22 urte).
https://www.berria.eus/paperekoa/1994/028/001/2020-03-11/carlsenen-aurkariaren-bila.htm