Osteguna, 2021eko apirilak 29a.
Ian Nepomniachtchi xake jokalaria, pentsakor. LENNART OOTES / EFE
Ian Nepomniachtchi da xakeko
Hautagaien
Torneoko irabazlea. Oldarkor baina praktikotasun handiz jokatuz
lortu du
garaipena. Hala, errusiarra izango da Magnus Carlsenen aurkaria,
Munduko
Txapelketan.
Josu Tornay
«Torneo
honetan jokatu
ditudan partidak dira nire mezua [Magnus] Carlsenentzat». Ian
Nepomniachtchi Nepo xake
jokalari errusiarra hala mintzatu zen astelehenan, Hautagaien Torneoa
irabazi
osteko prentsaurrekoan. Munduko Txapelketan aurkari izango duen
jokalariarentzat mezurik ba ote zuen galdetu zioten, eta ez zuen
argibide
gehiago emateko beharrik izan. Izan ere, hautagaien Torneoari
erreparatu
diotenek ikusi dute errusiarrak taula gainean erakutsi duen
oldarkortasuna,
baina baita praktikotasuna ere.
Inoizko Hautagaien Torneo luzeena izan da,
pandemiagatik eten
egin behar izan zutelako. Fabiano Caruana faborito nagusia nahiko
atzean geratu
zen azkenean, eta Anish Giri izan da ezustekoa, azken partidetan
indarra galdu
arren. Dena den, Vachier-Lagraveren errendimendua da batez ere
aipatzekoa.
Teimour Radjavoben ordezko moduan heldu zen torneora, eta
txapeldunorde izan da
azkenean.
Torneoko lehen partidan, Neporen mezua forma hartzen
hasi zen
jada, Herbehereetako Anish Giri nagusitasunez menderatu baitzuen.
Pieza
beltzekin aritu zen, eta irekitzetik aurkariaren erregearen kontra
egin zuen.
Baina horren maila handiko torneoetan oldarkortasuna ez da nahikoa,
praktikotasuna ere behar da. Eta hala jokatu zuen astelehenean,
Vachier-Lagrave
frantziarraren kontra. Partida ona izan zuen. Baina peoi bat gehiago
zeukan arren,
ez zen irabazten saiatu. «Giri galduta zegoela ikusi, eta ez
arriskatzea
erabaki dut, berdinketa ziurtatuz».
Azaroaren 24tik abenduaren 16ra Carlsen
norvegiarraren kontra
jokatuko du, Dubain, munduko txapelduna nor den erabakitzeko. Carlsen
da egun txapelduna,
baina Nepo da seguruenik orain arte izan duen aurkaririk
arriskutsuena. Izan
ere, aipatu bezala, oldarkor jokatzen du, eta betidanik posizio
taktiko eta
konplexuen bila joan da, irekitzetik aginte makila hartzeko edozein
aukera
baliatuz. Nahiz eta horretarako askotan arrisku handiak hartu behar
izan. Buruz
burukoa du gustuko; hori da haren espezialitatea. Baina partidak ere
galdu ditu
horren erruz, eta ikasi du zuhurrago izaten.
Carlsenek joko posizionalagoa dauka. Norvegiarrak ez
du ia
sekula abantaila berezirik bilatzen irekitzean, eta alde txikiak
bilatu ohi
ditu partidak aurrera joan ahala. Pieza gutxiko finalak dira haren
espezialitatea. Pixkanaka aurkaria akats txikiak egitera behartzen du,
eta
haren defentsa egitura apurtuz doa.
Zenbakiak Neporen alde
Oso interesgarria izango da azaroko lehia. Zenbakiak
Neporen
aldekoak dira. Partida estandar ofizialetan, 11 aldiz jokatu dute
elkarren
kontra. Horietatik lau errusiarrak irabazi ditu, eta bat norvegiarrak.
Besteetan berdindurik amaitu dute.
Euren arteko azken partida ofiziala Carlsenek
irabazi zuen.
Gainera, Nepok umeak zirenean irabazi zizkion partida gehienak. Nepok
argi utzi
du bere estrategia. Orain Carlsenek ikusi behar du zer egin munduko
onena
izaten segitzeko. Vladimir Kramnikek 2000. urtean Gari Kasparovekin
egin zuena
estrategia egokia izan daiteke: irekitzeko posizio lehorrak bilatu,
eta joko
posizionalean oinarritu, aurkariak pazientzia galdu arte.
Partida bizkorrak izango dira berdinketa hausteko
sistema,
eta hor Carlsenek abantaila dauka. Modalitate horretan Carlsenek sei
garaipen
ditu, eta Nepok sekula ez dio irabazi. Biek 30 urte dauzkate, eta
euren garai
onenean daude. Azken urteetako Munduko Txapelketa
interesgarrienetarikoa izan
daiteke.