Osteguna, 2022ko uztailak 7a.
Magnus Carlsen eta Ian Nepomniachtchi aurrez aurre
abenduan
jokatutako finalean. LESZEK
SZIMANSKI / EFE
Nepomniachtchik nagusitasunez
irabazi du
Hautagaien Torneoa. Baina, oraingoz, Carlsenek ez du argitu Munduko
Txapelketako finala jokatuko duen. Formatuan aldaketak eskatu ditu.
Josu Tornay
Iazko abenduan, Xakeko Munduko Txapelketa bosgarren
aldiz
jarraian irabazi eta gero, hurrengo finala jokatzea «zaila» izango
zela esan
zuen Magnus Carlsen txapeldunak. «Nahiz eta irabazi, gauza negatiboek
positiboek baino pisu handiagoa daukate». Bi urtean behin sei
hilabetez
pertsona bakar baten aurka jokatzeko prestatzeak nekea eragiten du,
eta
ekonomikoki ere aukera hobeak izango zituen. Hala eta guztiz ere,
Hautagaien
Torneoa Alireza Firouzjak irabaziz gero, Carlsen prest agertu zen
jokatzeko.
Belaunaldi berriaren ikurra aurrean izateak motibatu egiten zuen
Carlsen.
Hautagaien Torneoa, ordea, amaitu berri da, eta Firouzjak ez zuen
halako torneo
batean behar den maila erakutsi. Berriro ere Ian Nepomniachtchik Nepo-k
irabazi
zuen. Horrenbestez, Munduko Txapelketako finala airean dago.
Hautagaien Torneoaren inguruan azterketa hau egin du
Alejandro Franco nazioarteko maisuak. «Nepo borrokalari hutsa da,
baina ez nuen
espero hain fin jokatzea. Bestalde, Firouzja gorago ibiliko zela
espero nuen,
baina argi dago asko falta zaiola». Horren arrazoiak azaldu ditu
Francok.
«Carlsenen aurkako norgehiagokaren ostean, Nepok lan handia egin zuen,
eta hau
da emaitza. Irekitzeetako prestakuntza eta jokaldien kalitatea ia
akatsik
gabekoak izan dira. Bestalde, Firouzjak talentu handia dauka, baina
baita
esperientzia falta ere». Adibidez, Neporen kontra jokatu aurretik,
Interneten
partida bizkorrak jokatzen pasatu zuen gaua. Francok ez du egoki
ikusten:
«Onartezina da horrelako torneo batean».
Nepok 9,5 punturekin lortu zuen lehen postua,
partida bat ere
galdu barik. Bestalde, Firouzjak 6 puntu egin zituen. Azken txandan
zoria alde
izan zuen, Fabiano Caruanari irabaztekoa. Horrela, azken bi
postuetatik aldendu
zen, eta seigarren geratu zen.
Torneoa aprobetxatuz, Carlsen Madrilen izan da bere
enpresa
bateko sustapen lanak egiten, eta Arkadi Dvorkovitx FIDE Xakeko
Nazioarteko
Federazioko presidentearekin batzartu zen. Jakin denez, finala
jokatzeko
Munduko Txapelketako formatuan aldaketak proposatu zizkion. Antza,
finalaren
iraupena mugatzearen eta partida bizkorrek tokia izatearen aldekoa da.
Francoren ustez, joko psikologikoaren parte izan daiteke. «Nire
iritziz, jokatuko
du. Abantaila psikologikoa lortzeko asmoz, nolabait, mezu bat bidali
nahi izan
dio aurkariari: ez duela bere kontra jokatzea merezi».
Ez da lehen aldia
1972an antzerako zerbait gertatu zen. Bobby
Fischerrek
askotariko eskakizunak egin zituen Boris Spaskiren kontra jokatzeko:
dirua,
torneoko formatua eta ordutegia, publikoarekiko distantzia,
telebistako kameren
kokapena, eta abar. Azkenean, Spaskiren borondate onari esker jokatu
zen
finala, eta Munduko Txapelketa Fischerrek irabazi zuen.
1975ean ere egin zituen eskakizunak. Larregizkoak
izan ziren,
eta FIDEk azkenean ez zuen amore eman. Fischer ez zen aurkeztu, eta
Anatoli
Karpov hautagaiak jokatu barik jantzi zuen txapela. 1993an, Gari
Kasparovek,
munduko txapelduna izanda, PCA Xakelari Profesionalen Elkartea sortu
zuen, eta
Munduko Txapelketa paralelo bat antolatu zuen. XXI. mendeko hasiera
arte, bi
Munduko txapeldun izan zituen xakeak: FIDEkoa eta PCAkoa, alegia, Gari
Kasparov.
Beraz, oraingo Hautagaien Torneoan bigarren
geratzeak
garrantzi handiagoa izan du. Carlsenek jokatuko ez balu, bi aukera
egongo
lirateke. Lehena, Hautagaien Tornea irabazi duen jokalariari txapela
ematea —esan
bezala, 1975ean hala egin zuten— edo torneoko lehen bi sailkatuen
arteko
norgehiagoka antolatzea. Jokalariak jakitun ziren horretaz, eta azken
txandako
Ding Liren eta Hikaru Nakamuraren arteko partida erabakigarria izan
zen.
Lirenek ziurtasunez jokatu zuen, batez ere joko taktikoan, eta
bigarren postua
ziurtatu zuen. Agian, horrek Munduko Txapelketa jokatzeko aukera
emango dio.
Finalaren iraupena mugatzearen
eta partida bizkorrek tokia izatearen aldekoa da Carlsen
https://www.berria.eus/paperekoa/2125/020/001/2022-07-07/oraingoz-kolokan-dago-finala.htm